Chandrapur Varta
*चंद्रपूर,5 ऑगस्ट 2026*
स्वीकृत सदस्यांच्या नियुक्तीवरून आणि वारंवार नियम डावलल्याच्या आरोपावरून आज चंद्रपूर महानगरपालिकेची सर्वसाधारण सभा गदारोळात तहकूब झाली. सत्ताधारी आणि विरोधकांसह तब्बल *45 नगरसेवकांनी सभेवर बहिष्कार* टाकल्याने महापालिकेचे वातावरण चांगलेच तापले.
*बहिष्कारात कोण?*
बहिष्कार करणाऱ्यांमध्ये *उपमहापौर, स्थायी समिती अध्यक्ष आणि भाजप, शिवसेना, शिवसेना उबाठा, काँग्रेस, महानगर आघाडी* या चारही प्रमुख पक्षांच्या गटनेत्यांचा समावेश होता.
नगरसेवकांचा आरोप आहे की, प्रशासनाने नियमानुसार स्वीकृत सदस्य नियुक्तीचा प्रस्ताव दिला असतानाही महापौर *संगीता खांडेकर* यांनी तो विषय टाळला. तसेच वारंवार नियम डावलून सभा घेतल्या जात आहेत आणि आमसभेचे कामकाज मनमानी पद्धतीने चालवले जात आहे.
सभेत काय घडले?
आज दि. 5 ऑगस्ट 2026 रोजी दुपारी मनपाची सर्वसाधारण सभा बोलावण्यात आली होती. विषय पत्रिकेवर स्वीकृत सदस्यांच्या नियुक्तीचा मुद्दा होता.
आमसभेचा कोरम पूर्ण करण्यासाठी 22 नगरसेवकांची आवश्यकता असते. बहिष्कारामुळे महापौरांसह भाजपाचे केवळ *7 नगरसेवक* सभागृहात उपस्थित होते. दरम्यान, काँग्रेसचे राजेश अडुर आणि वसंता देशमुख यांच्यासह काही नगरसेवकांनी हजेरी लावल्याने कोरम 22 पर्यंत पोहोचला. त्यानंतर महापौरांनी कामकाज सुरू केले.
याचवेळी काँग्रेसचे गटनेते *सुरेंद्र अडबाले* आणि महानगर आघाडीचे गटनेते *पप्पू देशमुख* आपल्या सहकाऱ्यांसह सभागृहात आले. देशमुख यांनी सचिव *संतोष गर्गेलवार* यांच्याकडून महानगरपालिका अधिनियमाचे पुस्तक हिसकावून घेतले आणि ते आयुक्तांसमोर ठेवून नियम वाचण्याची मागणी केली. यावेळी सचिवांचा माईकही तोडण्यात आला.
बाहेर काँग्रेस आणि महानगर आघाडीच्या नगरसेवकांनी महापौर कार्यालयासमोर बॅनर घेऊन जोरदार घोषणाबाजी आणि निदर्शने केली.
भाजपाचे गटनेते *शेखर शेट्टी*, नगरसेवक *सुभाष कासमगोट्टूवार*, *संजय कंचर्लावार*, तसेच उबाठाचे उपमहापौर *प्रशांत दानव* आणि स्थायी समिती अध्यक्षा *मनस्वी गिऱ्हे* यांनीही आक्रमक भूमिका घेत सभागृहाचे कामकाज बंद पाडण्यासाठी दबाव आणला.
अखेर या अभूतपूर्व गोंधळानंतर महापौर संगीता खांडेकर यांनी सभा *अनिश्चित काळासाठी तहकूब* केल्याची घोषणा केली.
*नगरसेवकांचा आरोप काय?*
1. *स्वीकृत सदस्य नियुक्ती*: यापूर्वी रद्द झालेल्या सभेतील विषय पुन्हा जाणूनबुजून टाळला जात आहे.
2. *नियमबाह्य कामकाज*: आमसभा वारंवार नियम डावलून बोलावल्या जात आहेत.
3. *कंत्राटदारांना अभय*: गोंधळ करून अमृत पाणीपुरवठा आणि भूमिगत गटार योजनेच्या कंत्राटदारांना पाठीशी घालण्याचा प्रयत्न होत आहे. यामुळे शहराच्या विकासात अडथळा निर्माण होत आहे.
बहिष्कार करणाऱ्या 45 नगरसेवकांनी जोपर्यंत नियमाने कारभार होत नाही तोपर्यंत सभेत सहभागी न होण्याचा इशारा दिला आहे.
